Vakavakarau na Yanuyanu ko Ovalau

Era sa vakavakarau tu na lewenivanua ena yanuyanu ko Ovalau ena soqo ni veibuli vua nai Taukei Nabukebuke na Turaga na Tui Levuka ena siga Tusiti mai oqo.

Esa oti oqo e 16 na yabaki na kena lala tu mai nai tutu oqo, ia e sa vakarau me tawani tale nai dabedabe vakaturaga ena nona sa vakarau buli ko Ratu Etonia Seru Rokotuinaceva me taura nai tutu bibi oqo.

Na turaga tamadra ko Ratu Kolinio Rokotuinaceva a taura taumada tiko mai nai tutu oqo me yacova na nodra mai vakacegu ena yabaki 2008.

E ra a cakacaka taumada tu mai vakamatanitu ko Ratu Etonia ni bera ni’ra vakacegu mai, ka’ra lesu kina nodra delaniyavu.

Na veibuli oqo ena vakayacori tiko ena koro vakaturaga ko Levuka Vaka-Viti.

Ena kawa vaka Tui Levuka, oqo nai katolu ni veibuli me na vakayacori. Na tubudra vakarua ko Ratu Samuela Macedru, a buli ena yabaki 1820, tarava na tamadra ko Ratu kolinio ena yabaki 1993.

Ko iratou na vuvale Bete ena mataqali na Burenitu ena yavusa o Solevu mai Bua,e ratou na vakaitavi tiko ena veibuli oqo.

E vakaraitaka ko Adi Kelera Molloy e dua na lewe ni mataqali ni a kau yani vei iratou ena yabaki sa oti nai tukutuku vakavanua me baleta na veibuli vua na Tui Levuka.

E ratou ciqoma nai tukutuku oqo, ka siko lesu ki Levuka me ratou lai vakaraitaka na nodratou vakadonumata, ni ratou sa ciqoma ka vakavakarau ena soqo bibi oqo.

Na veibuli oqo ena kauta lesu tale mai na veiwekani makawa sara ena vuvale e rua.

Ia, era na tiko talega na Turaga na Tui Namosi ko Ratu Suliano Matanitobua ena soqo oqo, me vakadinadinataki ga kina na veiwekani makawa mai liu ko Nabukebuke, Namosi kei na Nabukebuke mai Levuka.

Ko Ratu Etonia ena raica tiko na kena qaravi e 10 na koro ena tikina ko Levuka.

Vakatataro: salaseini.guniyaga@fijisun.com.fj