Na Bisinisi Quwawa, Yaqona
Sa noqu ivakasala ga vei ira na itabagone ka vakabibi vei keda na dau vakayagataki qele me da dau dinata ka makututaka na noda qarava na itavi lailai keda e da cakava me vaka ni vuqa vei keda e da sega ni rawta vinaka na vuli ka da rawa ga ni vutuniyau e na noda teivaka na noda qele.
Sunday 26 May 2024 | 18:49
Na itei ni quwawa ka ratou bucina tiko ko Marika Devatawalu kei iratou na nona mata veitacini ni se bera ni ra teivaki ena qele ka ratou lisitaka tiko vakavuvale mai Nadrola, Savusavu.
levu sara na veika e da rawa ni cakava kevaka e da solia kece na noda dina e na veika lalai kece e da qarava e na veisiga.
Ni tiko na yalo ni vosota e da na vakila ni toso vinaka na cakacaka ka vakabibi e na kena vakayagataki vinaka na qele me da vakaduri bisinisi kina.
Me da wilika mada nai talanoa ni nona vakayagataka na qele ko Marika Ragogo Davetawalu kei iratou nona mataveitacini me ratou vakaduri bisinisi kina. E sa yabaki 28 ko Marika ka cavutu mai Vatukarasa Baravi Nadroga, e vakawati ka dua na luvedrau. E nodratou iliuliu tiko ni teitei vakamataveitacini.
Related stories
VAKAMACALATAKAMADA NA YABAKI A TAUYAVU KINA NA NOMUNI VAKAYAGATAKA NA QELE?
Na 2020 keirau veitalanoa kei na tuakaqu ko Isikeli Seva Davetawalu me keirau siwa ka me voli kina e dua na neirau waqa. Sa qai mani veisau tale na veitalanoa me keirau mai tei yaqona e Savusavu. Mai na yabaki 2021 e na vula ko Me a tekivutaki kina teitei, ka sa mani tei na quwawa (green pearl guava) ena vula ko Maji, ena yabaki 2022.
E VUVAKACAVA NANOMUNI VAKAYAGATAKA NA QELE.
E dua na qele a dau teitei voli tu kina na tamai keitou ka sa mai leqa yani e na yabaki 2001 e na gauna au se kalasi dua kina, ka sa qai mai lisitaka e dua na turaga ni jaina ka sa sega na vanua me keitou teitei kina.
E na yabaki 2020 a qai mani kaya vei au na tuakaqu ni dua na qele mai Nadrola, Savusavu me volia me rawa ni mai teitei kina, ka sa ma ni vakayagataki sara tu vakavinaka na qele ka ratou cicivaka tikoga vakaveitacini. E ra sa mai cakacaka talega na lewe ni vuvale ka'ra teivaka talega kina na nodra yaqona.
Toso vinaka tiko na vakayagataki qele lako vata na kena matua ka volitaki talega na nodratou yaqona vakaveitacini mai Savusavu.
RAWA GA NI DUA NA NOMUNI VAKASALA VEI IRA NA LEWE-NI-VANUA, E NA BIBI NI KENA VAKAYAGATAKI NA QELE.
Sa noqu ivakasala ga vei ira na itabagone ka vakabibi vei keda na dau vakayagataki qele me da dau dinata ka makututaka na noda qarava na itavi lailai keda e da cakava me vaka ni vuqa vei keda e da sega ni rawta vinaka na vuli ka da rawa ga ni vutuniyau e na noda teivaka na noda qele.
KE TIKO E SO NA KA KEMUNI VIA WASEA, KE REA MO NI QAI WASEA MAI.
Au cavuta na vakavinavinaka vua na tuakaqu ko Isikeli Davetawalu e na nona yalodina me volia e dua na tiki ni qele me keitou teitei kina vakaveitacini ka vakakina vua na matanitu kau kerea ke ra bau raici na noda dau teitei e na vanua vakaoqo e na kena gadrevi na gaunisala ka usani tiko mai kina na neimami ivoli.
Vakatataro: salaseini.guniyaga@fijisun.com.fj
