Cakacaka ena Vakabauta
E vakaraitaka ko Alexandra ni tiko na nona sau ni vivivi ibe kevaka e katu rua e tiko e na $450, katu rua vakabati e tiko e na $700, na salusalu e tiko na kedra isau mai na $10 ka lako cake.
Saturday 30 November 2024 | 12:27
Alexandra Tikomaitoga ena loma ni nona sitoa ni volivolitaki ena Flea Market e Suva.
E dua na vuli vinaka e da na vulica kevaka me da vakamuri ira vakalevu na noda qase e na kena vakayacori e so na cakacaka ni liga eda sega tu ni kila rawa.
Oqo na veika e vakaraitaka ko Alexandra Tikomaitoga na goneyalewa ka cicivaka tiko na nona bisinisi ni cakacaka ni liga ena Flea Market e Suva.
Ni oti ga na nona fomu vitu mai Baulevu High School e sa nanuma sara me vakacegu toka mada vakalailai e vale ni bera ni tomana tale na nona vuli kina Univesiti.
Related stories
E kerea vua na marama na tinana me cakacaka toka mada valailai vua me vaka ni dua tale tikoga na nona bisinisi ni cakacaka ni liga e vale.
Ia e na gauna oya e sa bucina tiko kina me cakava e so na cakacaka ni liga ka sa kamikamica mai vua na cakava ka nanuma kina me sa na tomana tikoga na bisinisi oqo me yacova tiko mai nikua.
Vakaraitaka ni dau vakamuri tinana voli tu ga e na kena dau qaravi e so na cakacaka lalai me vaka na ukuukutaki, caka salusalu, ka vakakina na vavakula ka vulica talega mai vale na kena kulati na ibe kei na so tale.
Na veicakacaka lalai kece oqo e sa tugana sara tikoga ki lomana ka tuvatuvakataka tiko me na tauyavutaka kina e dua na nona bisinisi.
Nikua e sa cicivaka sara tikoga e dua bisinisi ni cakacaka ni liga e na nona teveli naba 31 e na Flea Market e Suva.
Mai na nona dau vakamuri ira voli na qase, e sa kila na kena kesavi na masi, sa lako talega me laki vulica na kena caka na salusalu ka vakakina e so na cakacaka ni liga lalai ka rawa ni vakavure rawaka vua.
E dua na ibe ka kulata ka volitaka tale tikoga o Alexandra ena nona sitoa.
E kaya ni keda na sega ni rawa ni cakacaka vinaka kece, ia e tu eso na cakacaka vakaoqo e da rawa ni cakava ka vinaka cake sara mai kina veicakacaka tale eso me vaka ni da lewai keda ga vakataki keda ka da rawata ga na veika e da sasagataka e na veisiga.
Veivakasalataki ko Alexandra vei ira na nona icaba me ra dau vakayagataka vinaka na taledi e tiko vei ira ka me ra kakua ni vakaweleweletaka ka vakakina na kena vakaliuci tikoga na Kalou me ikabasi tiko ni veika vinaka e na gauna sa tu mai matada.
Vakatataro: salaseini.guniyaga@fijisun.com.fj
